കാസര്കോട്: രണ്ട് പെരുന്നാളുകള്ക്കും ചുരുങ്ങിയത് മൂന്ന് ദിവസത്തെ ഔദ്യോഗിക അവധി പ്രഖ്യാപിക്കാൻ സർക്കാർ തയ്യാറാകണമെന്ന് സമസ്ത.നൂറാം വാര്ഷിക സമ്മേളന പ്രമേയത്തിലൂടെയാണ് സമസ്ത ആവശ്യം ഉന്നയിച്ചത്.
മുസ്ലിം സമുദായത്തിന്റെ ഏറ്റവും വലിയ ആഘോഷങ്ങളായ ഈദുല് ഫിത്വർ( ചെറിയ പെരുന്നാള്) ഈദുല് അദ്ഹ(ബലി പെരുന്നാള്) എന്നിവയുമായി ബന്ധപ്പെട്ട് നിലവില് നല്കിവരുന്ന അവധി ദിനങ്ങള് അപര്യാപ്തമാണ്. കുടുംബബന്ധങ്ങള് പുതുക്കുന്നതിനും മതപരമായ കർമ്മങ്ങളില് ഏർപ്പെടുന്നതിനും ദൂരസ്ഥലങ്ങളില് ജോലി ചെയ്യുന്നവർക്കും പഠിക്കുന്നവർക്കും നിലവിലെ ഒന്നോ രണ്ടോ ദിവസത്തെ അവധി ഒട്ടും സഹായകരമല്ല.
ഗള്ഫ് രാജ്യങ്ങളിലുള്പ്പെടെ ആഗോളതലത്തില് ഈദ് ആഘോഷങ്ങള്ക്കായി ദീർഘമായ അവധി നല്കുന്ന മാതൃക പരിഗണിച്ച്, കേരളത്തിലും രണ്ട് പെരുന്നാളുകള്ക്കും ചുരുങ്ങിയത് മൂന്ന് ദിവസത്തെ ഔദ്യോഗിക അവധി പ്രഖ്യാപിക്കാൻ സർക്കാർ തയ്യാറാകണം. ചന്ദ്രദർശനവുമായി ബന്ധപ്പെട്ട അനിശ്ചിതത്വം കാരണം പെരുന്നാള് അവധി പലപ്പോഴും കൃത്യമായി ലഭിക്കാത്ത സാഹചര്യം ഒഴിവാക്കാൻ പെരുന്നാളിന് മുമ്പും ശേഷവുമുള്ള ദിവസങ്ങള് കൂടി ഉള്പ്പെടുത്തി അവധി കലണ്ടർ പരിഷ്കരിക്കണം'- സമസ്ത ആവശ്യപ്പെട്ടു.
ജുമുഅ നമസ്കാരത്തിന് തടസ്സമാകാത്ത രീതിയില് പരീക്ഷാ സമയം നിശ്ചയിക്കണമെന്ന് സമസ്ത ആവശ്യപ്പെട്ടു. ജുമുഅ സമയത്ത് പരീക്ഷയും ക്ലാസുകള് നടത്തുന്നതും വിശ്വാസികളായ വിദ്യാർത്ഥികളോടും അധ്യാപകരോടുമുള്ള അനീതിയാണ്. പൊതുവിദ്യാഭ്യാസ കലണ്ടറില് സാമുദായിക സാഹചര്യങ്ങള് പരിഗണിക്കണമെന്നും മദ്റസാ സമയ വിഷയത്തില് സർക്കാർ നല്കിയ ഉറപ്പ് നടപ്പില് വരുത്തി ഉത്തരവിറക്കണമെന്നും സമസ്ത ആവശ്യപ്പെട്ടു.
0 Comments