കഴിഞ്ഞ ഖത്തര് ലോകകപ്പോടെയാണ് സുബൈര് വാഴക്കാട് നാട്ടിലെ താരമായത്. അര്ജന്റീനയുടെ കട്ട ഫാനായ സുബൈര് ലോകകപ്പിനിടെ മത്സരങ്ങള് അവലോകനം ചെയ്തും പ്രവചിച്ചും കമന്ററി പറഞ്ഞും സോഷ്യല് മീഡിയയില് സ്റ്റാറായി. എന്നാല്, കളി പറച്ചിലിനിടയിലും സുരക്ഷിതമായ വീടെന്ന സ്വപ്നം സുബൈറിന് അകലെയായിരുന്നു. ഇതറിഞ്ഞ കണ്ണൂര് പയ്യന്നൂര് സ്വദേശിയായ അഫി അഹ്മദ് വീട് നിര്മിക്കാന് മുന്നോട്ടുവരുകയായിരുന്നു. 70 ദിനം കൊണ്ട് വീട് പൂര്ത്തീകരിക്കാന് സാധിച്ചതില് അതിയായ സന്തോഷമുണ്ടെന്ന് അഫി പറഞ്ഞു. ആദ്യം ഖത്തറില് പോയി കളി കാണാന് എല്ലാ ചിലവും വഹിക്കാമെന്നാണ് അഫി പറഞ്ഞിരുന്നത്. എന്നാല്, പ്രായമായ പിതൃ സഹോദരിമാര് വീട്ടിലുള്ളതിനാല് വാഗ്ദാനം സുബൈര് സ്നേഹപൂര്വം നിരസിക്കുകയായിരുന്നു. ജനുവരി ഒന്നിന് സുബൈറിന്റെ വീട്ടിലെത്തിയ അഫി ആദ്യ ഘട്ട ചെലവിന് നാല് ലക്ഷം രൂപ കൈമാറിയിരുന്നു.
വീടിന്റെ മുകള് ഭാഗം ഫുട്ബാളിന്റെ രൂപമാണ്. എന്ജിനിയര് സഫീറിന്റെ ജേംസ്റ്റോണ് എന്ന കമ്ബനിയാണ് രൂപകല്പ്പനയും നിര്മാണവും. പഞ്ചായത്തംഗം എം.കെ.സി. നൗഷാദ്, എം.പി. അബ്ദുല് അലി എന്നിവരുടെ നേതൃത്വത്തില് സ്വാഗത സംഘം രൂപവത്കരിച്ച് ഈ മാസം 19ന് നടക്കുന്ന ചടങ്ങ് ആഘോഷമാക്കാനുള്ള ഒരുക്കത്തിലാണ് നാട്ടുകാര്.
0 Comments